尋日發生一件比《達文西密碼》更加難破解懸疑大事！煲呔曾蔭權晨早去完一個青年活動後，就同老婆鮑笑薇即刻坐直升機飛過澳門，據講係應邀澳門特首何厚鏵之約，一齊傾點樣準備六月昆明舉行泛珠三角合作及發展論壇，但奇就奇在正兩位特首傾緊時候，前政務司司長陳方安生率領一班港英年代行政局舊電池大搖大擺操出澳門港澳碼頭，話要去遊覽同舊，好戲於是揭開序幕。
一大班舊電池包括資深大狀張健利、青協總幹事王鳴、豐亞太區主席鄭海泉同嶺南大學校長陳坤耀離開碼頭後，就匆匆上專車向黑沙威斯丁酒店方向絕塵而去，然後失去蹤影。而煲呔見完何厚鏵之後，也同告失蹤，曾、陳「澳門密會」之說即不脛而走。
畢竟，外界仲度估量緊陳方安生係咪出同煲呔爭選特首時，曾、陳兩人好可能要「密會」傾掂數？煲呔係咪勸陳太棄選呢？仲有若果要傾呢大事，又做乜要大批舊電池做人證，係咪有人經常無口齒所致呢？大堆疑問都難以解答。
相約澳門避耳目 話時話，佢揀澳門「密會」又真係幾高招，因為澳門鏵哥地頭，斷估唔會爆出竊聽風波咁事。再者，澳門咁近內地，中央官員經常順便去澳門行，呢班舊電池當中，話唔定有人以為可以好幸運咁在澳門遇到中央高官嘛。澳門咁安全又咁方便，不但舊電池鍾意，日後仲可能會成為反對派與中央接觸的理想場地，因為係人都知反對派中人，唔少係無回鄉證，無得返內地，而澳門就唔會拒絕佢入境。
不過，事件都幾反高潮，煲呔夜晚施施然現身澳門碼頭返港之時，「真相大白」，佢話：「同陳太佢一齊玩。」仲話大家成日一齊玩添，而「密會」地點則在當地新景點漁人碼頭；而陳方安生就話玩得好開心，至於有冇傾選舉問題，佢就黑面，佢答案係咪解答晒所有疑問，就要大家自行判斷！
曾蔭權今次上演政壇《達文西密碼》，仍有很多疑問未解。（林崢攝）