世界盃全球狂熱！身為晨曦及明星足球隊主將的林文龍，竟在這四年一度的盛事前宣布「掛靴」，一切全因他在比賽中被對手撞倒，跌斷了右膊鎖骨，經過了三個月的「廢人」生活後，對人生得失有了更深的領悟。而對於法國球王施丹踢埋今屆世界盃便「掛靴」，文龍亦大表支持，畢竟在適當時候引退，反能讓人留下美好回憶！
攝影：馬永堅 文：專題小組
為了克服心理陰影，正所謂「邊度跌低，就邊度起番身」，文龍帶我們重返球場，可謂感觸良多，看到他將所有心愛波鞋逐對放入旅行袋中「掛靴」，神色黯然……
文龍性格一向樂觀，但受傷後一星期，人生觀變得很灰，從沒有想過斷一條鎖骨，對他造成如此大的影響，這段日子對文龍來說可謂苦不堪言，因為鎖骨斷開，右手完全不能提起，簡單如抹汗、擦牙、食飯、沖涼與覺這些動作，全部都不能做，要重新學習如何用左手，坐覺足足一個月，令他得到了很大啟發。
健康是福 文龍說：「以前踢波成日見人受傷跛腳，傷親都要抖一頭半個月，聽人講點慘點慘，自己始終領悟唔到，今次受傷之後先真正知道種慘法，原來健康先係最寶貴，其實個人無事無幹，就已經好幸福。」
「廢人」生活至今只過了一半，斷開之鎖骨已逐漸愈合，終於可以「」落張床度，對於一生最愛之足球，文龍之睇法亦有所改變。
他說：「以前踢波好搏，住個波可以一口氣過幾個對手，就算蝕都會照去，但經過今次之後，我唔會再畀自己受傷，因為隨住人年紀愈大，康復時間亦愈長，同一個位置受傷，十八歲只需要個半月就埋口，我就要三個月，仲要完全影響工作同生活，本來做運動係為健康，搞到受傷就唔好啦！」
脾氣收斂 經此一役，文龍心態已不同：「以前踢前鋒，一定畀人踢，如今會轉踢後，仲會望清楚，見對方打得兇狠，咪畀個波人囉！」
未能再在球場上盡情地衝鋒陷陣，文龍並不覺得可惜：「人係需要有經歷先會長大，好似我初初入行，性格好火爆，就係撞得板多，先至變得成熟，我依家脾氣不知幾咁好。」
施丹明智光榮收山 今屆世界盃即將舉行，雖然林文龍因傷關係未能親往德國睇波，但他在香港亦不會放過，對於「超級球星」施丹在完成了世界盃後亦會掛靴，從此退出球場，文龍覺得是明智選擇。
他說：「踢波係一項好講體能運動，點好波都冇辦法敵得過年紀大，落場時就算有技術，但冇體能都冇用，好似施丹咁雖然仲可以應付得到，但體力上明顯不及以前，未被淘汰之前選擇自己退出，確係明智之舉，始終都係一代球王，最光輝時間告別球迷，總好過黯然離去。」
趁傷炒股大有斬獲 今次因傷休息三個月，完全不能工作，雖然無收入，但文龍每日在家中全情投入股票買賣，而且眼光獨到，在早前一輪升勢中就大有斬獲。
文龍說：「夠生活咁啦，其實以前都有玩開，但一開工就唔玩得，因為唔可以經常睇住個市。」
原來文龍玩股票都有過十年經驗，在九七金融風暴時都趕得及離場，未有損手爛腳，問他投資心得是甚麼，他說：「最緊要係識得忍痛，唔好怕蝕唔肯走，自己定個位之後一到就要走，否則一定輸死，正所謂『贏知足、輸要縮』就實無錯。」
林文龍