如果林敏驄唔寫歌佢可以踢波，唔踢波又可以講波，唔講波都可以寫波，所以波同歌佢都可以玩得頭頭是道，今期「向世界盃出發之BLOGBLOG齋」搵阿驄起仲未生筆，寫佢同「波」淵源，對森巴足球癡愛，總之呢個世界盃話題，林敏驄絕對係BLOG到應啦！
點解要有世界盃？因為有森巴足球，所以要有世界盃舞台讓它表演。呢個問題，就等於問我茶餐廳為甚麼要有茶杯？雪糕為甚麼要有雪糕杯一樣，答案是理所當然的！因為計我話，好話唔好聽，無論諗諗下即使係A、B、C、D、Ecup，也不如worldcup吸引……
腳法秀麗如搓老泥 如果問我覺得邊隊球隊最有冠軍相？答案一定係巴西！因為只有巴西，先至擁有我唔識（除馬納當拿，所以馬納當拿已經叛國加入巴西隊）；巴西每屆都以大熱姿態，從未間斷進入決賽周；只要佢肯踢，就好似大人同細路仔搓波仔一樣。
還記得蘇古迪斯、丹尼臣、伊度、李華度、鄧加、李維連奴、羅馬里奧、祖利亞、李安納度、朗拿度、朗拿甸奴……每屆都有新星上位、每屆都有新招、每屆都有驚喜！森巴足球，簡直好似我一樣超晒班。我歌仔《順德冇有線電台94世界盃主題曲》都有得唱：「現在我愛巴西隊，腳法秀麗，永遠係好少越位，射親波冇浪費，『搓』波好似『搓』老泥，應該冇問題！」（原曲：《Sealedwithakiss》）。
球王比利欲拜為師 至於我點解咁支持巴西隊？原因有段古……我與足球發生關係始於細路時，三歲的我即已表現出超凡脫俗兼天才橫溢加助攻助守、能傳擅射足球天分，踢法有點似現在的馬納當拿加朗拿度加朗拿甸奴加中田英壽！中三時，同學要我陪佢參加足總主辦的青少年足球訓練班，當時係足總練包勤執，分隊賽時，瀟灑我瀟灑地射入一記瀟灑的世界波（真人真事），助黃照保大驚之下，即叫我別再踢足總青年軍，還邀請我加入以腳法見稱的甲組球隊東昇青年軍（當時隊長是沈冠良）。可惜一屆之後，我以學業為重，暫別心愛的足球，球壇亦頓然黯然失色，再沒有出現如胡國雄般的一代球星（真人真事改編）。
時至今日，我依然係明星足球隊內唯一的巴西裔球員。球王比利來港，聽聞我咁好波，亦親筆為我寫上祝福，而且好想拜我為師，所以我每一屆也無可選擇地一定要支持我老家──巴西隊。
林敏聰