張文慈與死對頭葉璇，起初鬥賣肉鬧不和，最近行動已升級至互相隔空單打暗寸，昨日張文慈出席劇集《情陷夜中環２》宣傳時，表示不想與葉璇展開罵戰，坦言今次係最後一次提對方，實行與葉璇劃清界線。
張文慈、麥家琪、謝賢及陳啟泰昨日出席劇集《情陷夜中環2》宣傳活動，雖然主角之一的葉璇再次缺席，不過無損現場氣氛，張文慈與麥家琪更以性感打扮到場。
問到張文慈知否葉璇為何失場？她即劃清界線表示：「唔清楚，呢問番公關啦！公司叫我做乜就乜，葉小姐，我費事再講。（係咪有佢冇你？）唔係呢個問題，總之唔想再講佢，費事愈描愈黑、好似罵戰咁。（覺唔覺佢成日唔出席宣傳活動，好唔負責任？）我淨係做好自己。」
張文慈日前指葉璇自插，葉璇即以「黐線、變態」作反擊，對此，張文慈說：「當初我沙灘都唔係咁意思，不過唔使解釋咁多。我亦都唔介意佢咁講，總之唔想對罵，我自己收口。（怕唔怕日後合作撞口撞面？）唔怕，佢講我，都唔係第一次啦，唔想再互罵，佢要講我都阻止唔到，由佢講到夠，我唔想變成佢咁，今次最後一次講佢。（佢話你變態喎！）人話你傻就傻咩？我會笑住面對，佢咁講都係想我唔開心，我更加要開心。」
麥家琪置身事外 此外，麥家琪對葉璇又失場，她即衝口而出說：「！又要用我把口講佢呀。」及後即補鑊說：「其實好小事，我唔想加入戰團，佢今日要拍，再加上佢傷。（有冇問候佢？）有，仲出自真心添，不過唔想太煩佢，費事太造作。」
《情》劇監製鄭偉文指葉璇是因有事缺席宣傳，葉璇助手則指葉璇腳傷未愈，所以失場，並不是避與張文慈同場。
張文慈昨日以性感打扮出席新劇宣傳。