近日忙於拍戲及拍廣告的余文樂，前日特別抽空到金鐘太古廣場購買父親節禮物。由於父親節當日要為電影《龍虎門》宣傳，為表孝心的阿樂一擲數萬元，在LV店狂掃西褲及領呔，認真孝順。
余文樂前日頭戴冷帽、身穿T恤牛仔褲，在三名助手陪同下往太古廣場名店LV掃貨，記者見他左揀右揀，試了多件恤衫、西褲及外套。由於吸引不少傳媒在店外影相，店員大為緊張，先叫保安員阻擋記者鏡頭，之後又到阿樂身邊通水，不過阿樂就有理冇理繼續揀衫。
與小孩打招呼 據知，父親節當日，阿樂因返內地宣傳電影而未能陪伴父親，所以作為孝順仔的他為表孝心，預早抽時間買禮物老竇，由於兩父子的高度差不多，兼且父親經常打呔，阿樂最後買了多條西褲及領呔。當阿樂離開名店時，巧遇多名小朋友，友善的他主動與小朋友打招呼，大顯親民，令小朋友笑逐顏開。阿樂亦大方企定定讓記者拍照，其大袋戰利品則交由助手，他坦言買了數件貨品，說：「買好多呀，不過係買送畀爸爸，因為父親節就到喇。」
採訪：音樂小組
孝順仔阿樂豪擲數萬元買父親節禮物，認真抵錫。