蔡少芬（Ada）、黎姿（GiGi）、佘詩曼（阿佘）昨日出席《火舞黃沙》劇集宣傳活動大玩遊戲，期間當GiGi跑上了斜台後竟然叫救命，要林保怡抱她下台，成功搶鏡。
昨日三位女主角均以露膊衫及三、四吋高鞋上陣玩「扯大纜」，又在斜台跑上跑落玩遊戲，認真愛靚唔愛命。當GiGi玩遊戲上到斜台卻突然叫救命，保怡聞言即刻上演一場英雄救美，一手抱起對方落台，即時成為全場焦點。
事後GiGi解釋因穿的鞋很鬆，怕下斜台時甩掉，她說：「我知保怡一定會救我，因為平時同佢一齊做訪問，有乜難題佢都會幫我答，佢真係幾細心體貼。（係唔係你鍾意類型？）都係！我鍾意男士有肉地，有少少肚腩畀我倚靠就最舒服，保怡都諗得過，最衰佢係圈內人，如果唔係我都會考慮。」
Ada頸抽筋要針灸 當記者將GiGi的讚美說話轉告保怡，他口快快說：「佢都有啦！（有男朋友？）係有胃抽筋！（GiGi話唔揀圈內人做男朋友喎！）係啦！圈內人唔好，好似陳豪咪唔好囉！」似乎有暗寸陳豪之前夜訪湯盈盈香閨的緋聞之嫌。
而同場的Ada表示最近疲累過度，導致風寒入頸而抽筋，要看中醫針灸，並已連續兩日拮了支針在頸上，為了出席活動才把它拔掉。由於Ada在台上玩遊戲時太過投入，事後頸部感到有點兒痛楚，稍後會再去看中醫。另外，阿佘透露有份參與新碟《女兒紅》首日已賣清，自己想買亦買不到，結果要問高層樂易玲才得來一隻新碟。
黎姿站在台上大叫救命，林保怡立即英雄救美抱佢落台。
蔡少芬、黎姿與佘詩曼露膊衫，鬥搶風頭。