陳四萬心大心細想選特首，路人皆見，前日突然傳來煲呔同佢密會，當中蘊含政治訊息，外界一時難以揣摩，就連傳統左派都唔肯解讀，令成件事更添神秘色彩。不過，有政壇人士就話，《達文西密碼》懸疑隱秘做戲至有，現實世界邊有咁多符號意義，煲呔明目張膽會陳四萬，背後訊息只係想向大家展示一佢政治胸襟囉，唔係咩，連特首選舉路上唯一潛在對手，都可以好似朋友一樣把臂同遊，呢份包容，放眼四海，尤其在中國歷朝充滿血腥殺戮權力更替歷史中，可謂絕無僅有。
鄔維庸笑指花邊新聞 煲呔前日住小背囊，同陳四萬等一班前同僚暢遊濠江，有人揣測陳四萬已經被勸退，唔再發特首夢，所以同煲呔冰釋前嫌，又有人話，可能係煲呔想借呢次機會，就競逐特首寶座一事向陳四萬摸底講數，總之人言人殊。港區人大鄔維庸尋日被記者要求為事件「解碼」，點知鄔醫生反高潮，直指事件其實無乜神秘，大家當茶餘飯後花邊新聞睇就算啦。
鄔醫生拒當港版湯漢斯，絕對可以理解，有無人勸過陳四萬唔選特首，謎團就同耶穌到底有無結過婚一樣，可能永遠都唔會真相大白，如果靠估就猛吹陳四萬已經被勸退，咪盞將陳四萬塑造成好似聖經面被人扔石頭妓女抹大拉馬利亞，被人打壓，可憐兮兮，令更加多人同情、支持佢參選，陳四萬諗起都笑醒啦。
呢套由煲呔同陳四萬擔綱演出的政壇《達文西密碼》，收視率肯定媲美電影版，不過就苦煞一班業餘政壇影評人，好難落筆定調，有人就話，大家唔好中戲毒，將世事諗到咁曲折離奇，煲呔光天化日見陳四萬，只係想同大家講：陳四萬要同我爭特首寶座，不過我依然當佢係朋友，今次同遊澳門就係最有力明證啦。