煲呔曾蔭權於○四年八月返山東祭祖，忽然爆出話自己係曾子後裔，大家雖然半信半疑，但佢就鋪排出一個衣錦還鄉格局。第二年三月，董落曾上，出乎曾蔭權自己意料之外，佢得到中央器重，做特首。所以話祭祖都要時候，就好似育統籌局局長李國章今日同班鄉里返鶴山鄉下，但係就唔去祭祖，可能係時候未到，未係衣錦還鄉時候。
呢個叫做「志同道合好還鄉」二十人「鶴山回鄉團」，團友可謂猛人如雲，除阿瑟王李國章外，仲有中聯辦協調部副部長范瑞芳、行政會議成員梁智鴻、政協常委劉漢銓、港區人大代表吳亮星、建築師學會副會長鄺心怡同醫學界的李紹鴻等，唔講唔知，原來鶴山出咁多猛人。
做李氏家族代表 點解班鶴山鄉里忽然咁神心返鄉下？咁要講番今年三月北京召開人大、政協兩會期間，一班港區政協開會無聊時閒話家常，發現大家原來係同鄉，同聲同氣就決定返鄉下行一趟，唔好以為佢個個都係大忙人就係大隻講，回鄉團有拖冇欠，終於都能夠成行，因為遷就阿瑟王上個月要帶大學校長去瑞士同愛爾蘭考察，就押後到今日起行。
也有滄海遺珠，仍有鶴佬猛人未能成行，例如李氏家族香港咁威威，但就只得李國章一人隨團，佢胞兄、行政立法會議員李國寶、機管局主席馮國經、社署署長鄧國威同審計署署長鄧國斌就無暇出席。
回鄉唔去祭祖，節目都好豐富，成個育統籌局局長大駕光臨，又點會唔去睇學校呢？有梁智鴻同李紹鴻兩位大國手，當地政府又安排佢去參觀當地的疾病預防控制中心，同鶴山最大間印刷廠。