觀塘又現鼠蹤，繼上月(10月28日)有網民在觀塘鴻圖道2號一個新樓盤附近，拍攝到至少12隻老鼠「排住隊」竄入疑空置店舖內。近日再有網民在觀塘工廠區拍攝到一段令人毛骨悚然的「老鼠竇」影片。
據報現場在成業街一幢工廈內地下對開空地，從片中可見，一排超過10個綠色大型垃圾箱，一字排開靠牆擺放，部分堆滿垃圾的箱蓋未有冚好。鏡頭拉近一睇，恐怖一幕隨即出現，只見每一個垃圾箱底部、罅隙位，密密麻麻全部都是老鼠，有爬來爬去、有探頭探腦、有在地下快速穿梭，黑影湧動，根本分不清邊隻打邊隻；更恐怖的是老鼠完全不怕人，光天化日之下都繼續「開餐」，完全視途人如無物。拍片者不敢行近影，只在遠距離拍攝，邊拍邊講：「我諗100隻都有呀！痴X線！」。
東網記者今晨(5日)抵涉事工廈視察，該批垃圾箱內的垃圾已被清理，現場附近一帶仍見老鼠蹤影，有多隻肥鼠在垃圾箱旁穿梭，亦有多隻老鼠爬上垃圾箱覓食。另外在工廈旁後巷地上發現一包懷疑老鼠藥，巷內置有數個綠色垃圾箱，其中一個被人打開蓋，而近逃生門位置對出發現一隻死老鼠。據了解，食環署早前在涉事工廈內放置多個老鼠籠捕捉老鼠。
多名網民留言指，「唔淨指觀塘，今日見到九龍塘都有周街行」、「投訴過兩次，佢都唔X理」、「根本失控」、「香港人口七百萬，米奇應該有千四萬」、「國際米奇之都？」。
有滅蟲專家指出，老鼠身上帶有大量病菌，包括鼠疫、鈎端螺旋體病、沙門氏菌等，尿液及糞便一旦污染食物或餐具，市民進食後隨時上吐下瀉，嚴重者甚至可致命。加上老鼠繁殖力驚人，一對老鼠一年可繁殖成千上萬隻，若唔及時清除垃圾源頭，鼠患只會愈嚟愈失控。
事實上，本港近月鼠患已由街市、食肆，蔓延至大型商場、工廈後巷。早前青衣城食肆、紅磡、德福廣場等已相繼爆出「米奇陪食」事件，如今連日間工廈垃圾站都淪陷，足見食環署滅鼠工作完全追唔上老鼠繁殖速度。