樂壇天后容祖兒素有「工作狂」之稱，將於本月十六日生日的她，不但要在工作中度過廿六歲生日，還要到江門「掘金」，認真大吉利是！
祖兒昨日在沙田某酒店搞生日派對，與三百歌迷提早慶祝其廿六歲生日。席上，祖兒還親自設計Ｔ恤拍賣，由一名歌迷以三千元投得，祖兒將該筆款項撥捐「兔唇裂顎協會」，她自言希望歌迷把買禮物的錢捐給慈善機構，幫助有需要人士。
問祖兒最希望收取甚麼生日禮物？她謂：「我希望今年可以去睇麥當娜演唱會，佢好多地方都有演出，但如果可以近近去日本睇就好喇！（公司畀唔畀？）要問經理人Mani喎！」在旁的Mani聞言即說：「好，佢請埋我嘛，咪當送畀我份生日禮物囉！」
問到祖兒生日正日怎度過？她透露會到江門做騷，更以大無畏精神笑說：「我去江門掘金呀，（咁唔好意頭？）ＯＫ，幾好意頭呀！（正日都要做咁慘？）公司畀我揀，佢話一係揀工作中度過，一係揀屋企『躉』，咁我梗係揀做啦，好頭好尾嘛，代表年頭到年尾都有做！」
小歌迷變樹熊 另外，生日會上，大會安排歌迷與祖兒影大合照，當中有名年幼女歌迷像樹熊一樣攬祖兒的大腿不放，祖兒不但沒抗拒，還開懷大笑，且接受兩名小歌迷獻吻，認真艷福無邊。
採訪：倪小珊、李廣成
小歌迷像樹熊一樣，攬祖兒的腳不放，十分可愛。