譚詠麟（阿倫）昨日接受有線訪問宣傳其新片《我愛醫家人》。日前有報道指阿倫不滿環球的宣傳，影響其事業及兩名愛將余文樂與李克勤的成績，昨日記者向他求證，他謂：「呢說話唔係我講，但係我意思。」阿倫直言不滿陳小寶在位時用緋聞宣傳，以及公司的宣傳人員做事不夠嚴謹。「小寶仲環球陣，佢係好叻可以令公司冇蝕錢，但係佢宣傳方法我就唔認同喇，我覺得藝人有麝自然香，佢種宣傳方法會令個藝人偏。」
阿倫早前的歌曲《披羊皮的狼》於內地的Ringtone下載次數在年半內都高踞首位，但公布的數字就完全不同。問他是否懷疑有人黑箱作業？他說：「咁又唔係，數據都係人畀佢，但係我唔嘈，佢又唔會緊囉。」阿倫又謂他早已約滿環球，但若要他續約，就要環球先改善好以上的問題。
阿倫極討厭公司以緋聞作宣傳手法。