飽嘗政壇過山車的馬會主席夏佳理，曾經講過世事真係好奇妙，唔到你做計劃部署。睇剛做港交所主席的阿Ron夏佳理自己事前亦冇唸過以佢今時今日江湖地位，竟然亦要披甲上陣，冒險出戰法律界選舉會，替煲呔護航。真係人算不如天算！
曾代表地產界出任立法會議員夏佳理，過往一直係地產界組別選民，不過，阿Ron最近就出人意表地選委會選民登記中，轉會成為法律界選民。雖然阿Ron話打從加入行會後，自己已辭去地產建設商會的公職，早幾年前又自組律師樓，依家又係夏佳理、方和、吳正和律師事務所合夥人，覺得都係法律界登記做選民適合，但係項莊舞劍，呢個舉動已經被外界視為磨刀霍霍，整裝待發部署出戰選舉會，替煲呔力撼公民黨的票倉。睇好戲真係仍在後頭。
形勢凶險行全票制 問題係阿Ron今次出戰，係咪贏硬？以阿Ron今時今日的地位，當然有很多人忙敲鼓，搖旗吶喊。不過，有法律界人士就認為既使重量級的阿Ron出戰仍未必穩坐釣魚船。單看上次補選，在行內有頭有面的鄭慕智，輸成條街畀其時四十五條關注組支持的名不見經傳的新人，就知道形勢其實係好凶險。
再加上選委會的投票方式係全票制，而非比例代表制，按過往法律界選情結果，民主派一直穩奪六成多選票，要封殺親建制派候選人其實亦非難事。之所以法律界圈內已開始傳出本身是選委行會成員廖長城及胡漢清就係因為怕輸，而無意出戰。
看來阿Ron今次銳意博一鋪，不過已非二打六阿Ron今次若果不幸輸了，少不免要留下污名。不過，若然順利攻破公民黨在法律界的票倉，難保阿Ron勇往直前再下一城，圓其直選夢。