正與賭王在澳門法院對簿公堂的十姑娘何婉琪，昨日進一步反駁賭王指摘她阻撓澳博上市的言論，十姑娘質疑澳娛分拆澳博上市集資的動機，認為澳娛、澳博有累積盈餘及有盈利，實無必要上市集資一百五十億元，她指出:「我澳娛有咁多股份都無權出聲，一問就踢出局，胞妹都係咁下場，澳博上市，做股東得少少股份會有甚麼下場呢？」
自言一生人未輸過官司的賭王，日前在澳門法庭外，除了狠批十姑娘外，又堅稱澳博將如期上市，十姑娘對此提出質疑，「佢做咩咁心急要上市？其實我都唔知佢做咩要上市？一般公司要上市都係因為有發展計劃，但不夠資金，先要上市集資，但澳娛澳博完全冇咁需要。」
「係咪唔睇好澳博前景」 對於賭王在庭上稱「一上市，董事局一炮到一百五十億，一百五十億有好多盈餘會分畀股東」的講法，十姑娘表示：「賺梗生意點解要益外人？而且上市都係集資一百五十億，唔多錢，仲話其中有好多分畀股東，係唔係因為唔睇好澳博前景？驚唔夠美國佬鬥？」
十姑娘表示，澳博母公司澳娛滾存三百億累積盈餘，她曾經提出應該分給股東，何鴻燊表示為了投資建設不能夠分，「就算唔動用，子公司澳博上年賺四十幾億，連同過去幾年生意，累積唔少錢，錢去晒邊度呀？」
香港股民無得跨境追究 她提醒澳博上市後的小股民投資有風險，「大家睇我、睇澳娛股東，霍英東、葉漢就係最佳人辦，個個都不歡而散。」「我有咁多股東都無權出聲，一問就踢出局，可以踢埋你走，話唔畀你做股東，仲要通街唱你、鬧你。」另外，她指出根據香港有關法例規定，上市公司賺錢不一定要派息，還可以集資供股，「我都係為普羅小股民利益先反對澳博上市，仲有，澳門無（股票）交易市場，無相關法例，出事香港股民根本無得跨境追究。」
另外，曾與十姑娘有一段情的何鴻章，昨日接受本報記者越洋電話訪問，就何鴻燊罵十姑娘的話作出回應時表示，自己未有看報紙，不知道何鴻燊兄妹發生何事，他亦甚少與十姑娘有聯絡。被問到賭王形容十姑娘「賤格」，何鴻章表示：「十姑娘唔係咁人，佢好正當。」
十姑娘質疑何鴻燊硬要安排澳博上市集資的動機。
賭王周一在澳門法庭外強調表示，澳博將如期上市。（資料圖片）