老牌左派學校漢華中學尋日搞平頂禮，請政務司司長許仕仁出席主禮，六、七十年代，香港左派學校可謂受盡歧視，要錢冇錢，要地冇地！回歸九年，時移勢易，漢華中學小西灣校舍如期竣工，仲變成直資一條龍中學，都係多得官商合作，令愛國學校鹹魚翻生。
阿謙肥龍數 漢華吐氣揚眉，全靠一班今日已成大器的校友，當中包括中聯辦主任助理王如登，同埋港區人大代表葉國謙等，由批地到建成，阿謙都親力親為，務必要完成已故漢華校長黃建立遺願，佢尋日仲帶許仕仁參觀新校舍及設施，去到未裝音響演講廳，阿謙趁機向許仕仁數，要求愛音響又愛聽音樂許老爺搵佢私伙幫幫手，許仕仁話佢屋企套梗唔得啦，但就話軟件上幫下手都OK，即係第時漢華中學學生，有可能聽到許老爺最愛鬼佬大戲，即係OPERA。
所以話呢，呢個世界咩都講關係，漢華搵瑞安集團做承建商，原來背後都有段古，話說該集團副董事長王英偉同漢華中學校董會主席崔綺雲係港大同窗，王英偉話，除畀面同學，佢自己都積極監工，費事行政會議召集人梁振英同葉國謙不時打電話追問工程進度。
身為漢華校董梁振英出錢又出力，不但幫學校籌得一千二百萬元經費，仲特別廣東運一棵琴葉榕去學校，畀學生打波時有樹遮蔭，梁振英對琴葉榕確實有研究，佢話呢種樹樹葉大，方便清理，仲樹上點幾點，方便後人知道幾時可以拆枝開枝散葉，真係細心。
許仕仁（右）撐場，葉國謙（左）特別高興。（蘇文傑攝）