近日發生「巴士阿叔」怒罵地產四眼仔事件，連豐銀行首位華人大班鄭海泉都好有感受，事關佢細個都慘遭類似經歷，但對手唔係「巴士阿叔」，而係「學校阿叔」。話說佢小學成績差到入唔到公立中學，於是就焗住報讀類似而家職業先修學校實用中學，點知學校阿叔同鄭媽媽講，實用中學係專收籮底橙，聽到都好傷，所以鄭大班話有壓力唔代表可以侮辱人！
鄭大班尋日同旺角勞工子弟學校師生分享成功心得時，就自爆自小家境貧窮，讀書又唔爭氣，入唔到公立中學，但入讀私立中學每月學費要二十五蚊，報讀實用中學每月只需五蚊，於是鄭媽媽就帶佢去福華街實用中學臨時校舍報名。間臨時校舍簡單到搭幾個鐵箱做課室，鄭媽媽就問學校一位阿叔，乜叫做「實用中學」，點知阿叔完全無理人感受話：「咪專收籮底橙咯囉！」
多得學校阿叔鬧醒 呢件事令鄭大班記咁多年，並唔係因為學校阿叔踩佢，而係阿叔傷害鄭媽媽感受，事關鄭大班細個已患上小兒麻痹症，鄭媽為醫佢，將自己金器首飾賣晒，多年來悉心照顧，豈容一個阿叔大言不慚呢！所以鄭大班對「巴士阿叔」另有一番感受，認為人人都有壓力，但有壓力並不代表可以侮辱人，總之做乜事之前都要顧及人感受！
雖然被學校阿叔嘲諷為籮底橙，但知識能改變命運，就算籮底橙都變成金！鄭大班多年來做過會計、洗碗、大學導師、經濟學家，經過多番努力同奮鬥，終於有今時今日地位，呢個已經證明唔係籮底橙，狠狠地剝學校阿叔棚牙！不過，令鄭大班一生最遺憾，就係父母睇唔到佢今日成就。
鄭大班仲期望時下年輕人，態度切勿輕浮，培養好表達能力同人際關係，多讀書，唔好成日掛住打機同八八卦卦！