係人都知，民主黨李柱銘、壹傳媒主席黎智英同天主樞機主陳日君，呢個「搞事三人組」friend過打band，仲搞到政改方案胎死腹中，連政制發展專責小組領導肥龍許仕仁都要大聲痛斥。不過，煲呔曾蔭權上星期六同陳四萬在澳門密會消息曝光後，當大家估緊陳四萬會點回應時，咁前晚有人見到「搞事三人組」拉隊去鯉魚門食海鮮，仲搞到好秘密，話唔定係為陳太商討下一步對策都未定。
肥佬黎行先見記者即面黑 夜晚七點九，「搞事三人組」同五、六個朋友在鯉魚門海傍徑出現，步入一間好出名海鮮酒家食飯，李柱銘同黎智英仲帶埋老婆一齊去，當記者欲上前訪問同拍照之際，隨即被酒家職員阻擋同搶去相機，仲報警處理，記者於是守候門外，而酒家亦派人守住房門口，監視記者一舉一動。不過，從房外隱約見房內眾人言談甚歡，陳主仲一度企起舉杯叫大家飲杯，認真有興致。
據講，前晚個海鮮餐都好豐富，佢點八至九味，唔係靚唔食，有清蒸南非翡翠斑、焗黃油蟹、豉椒炒蘇格蘭聖子、炒蝦球同炸雞等。食到晚上約十時四十分，眾人開始離開，肥佬黎兩公婆先行，但可能已畀人撞破，所以塊面黑過黑面神。
李柱銘發爛渣陳日君陰笑 而李柱銘同陳日君由酒家職員引路，從後門走到停車場車，記者欲舉起相機影相時，兩人用遮擋住，好似做壞事咁。記者在停車場上前訪問李柱銘，李態度認真惡劣，惡形惡相指住記者鬧：「我都明白你，你做呢最乞人憎，影咩！不過我都明白你……」而陳日君就細細聲講：「你唔好煩我啦！」其他問題一概唔答，仲陰陰嘴笑。
老實講，黎智英旗下集團記者跟得人多，今次畀人跟番，應該「食得鹹魚抵得渴」。講到李柱銘，佢搞政治咁耐，又曾經被指是李漢奸，自己咁乞人憎，仲惡人先告狀，真難頂！
李柱銘包接送，車陳日君離開。
黎智英坐在車後座，塊面黑過黑面神。