近排城中最八謎團，唔係政黨內鬼「真兄弟」神秘身份，亦唔係耶穌基督有無血脈流傳至今，而係首富誠哥究竟會為出世孫仔起個乜名？呢個肥肥白白小寶寶咁識投胎，揀做超人後裔，叫乜名條命都唔差得去邊啦，誠哥尋日透露，乖孫個名已經定，不過全家一致通過，唔會咁快對外公布，大家慢慢估啦。好彩誠哥唔係話要徵詢孫仔意見，否則大家咪要吊癮幾年？
一般平民家庭，子孫滿月例必擺番幾圍，大宴親朋，潮州人重視男丁，以誠哥身家，同孫仔響六星級酒店搞個三日三夜豪門宴都係濕濕碎。不過各位大酒樓經理可以慳番，唔使時間打電話搵生意，因為誠哥尋日長和系周年股東大會上講到明，自己生日都從來無慶祝，個孫滿月最多屋企加多兩道菜，一家人吃餐飯就算，完全符合誠哥一向低調作風。大家或者記得，誠哥曾經一隻電子錶戴足幾十年，富而持儉，就算首個男孫滿月咁大件事都唔例外，能夠做到首富，真係有佢道理。
挺曾非為造勢 誠哥身家咁勁，有無諗過催谷小超人同小小超，幫佢湊夠支足球隊呀？誠哥即刻推莊畀身邊小超Victor，叫佢自己答。Victor笑笑口咁話：「至生完一個，呢個問題遲再答。」估唔到呢對見慣大風浪商界父子兵，一提到生兒育女問題，都係咁怕醜。
誠哥首添男孫，心情靚到絕，尋日記者會全程四萬咁口，笑容仲係好甜好甜隻。不過，講到「四萬」陳方安生可能參選特首，挑戰煲呔曾蔭權，誠哥就不予置評。誠哥話，上次長實業績報告會「挺曾」，只係記者問到，佢就心有句就答句，唔係刻意為煲呔造勢。佢一再話，煲呔做事公正無私，一心一意為香港創造未來，有領導能力，有公信力，所以咪表態支持囉，至於其他可能候選人，報紙寫好多，佢唔答囉。超人真係含蓄。
誠哥喜獲男孫，昨在記者會上有問必答。（梁偉年攝）