賭王何鴻燊活到八十多歲，在江湖打滾逾六十載，可謂見慣風浪，昨日的官司令人對他一向的紳士形象大打折扣。在法庭上他大部分時間都氣定神閒，散庭後，他被記者問及「對頭人」十姑娘，便大動肝火，咬牙切齒一口氣激數十姑娘不是，講到氣頂，甚至用「賤格」字眼來洩憤。
賭王昨日甫離開法庭，仍笑笑口向記者打招呼，在停車場立即被記者包圍，賭王似乎早有準備，企定定聽記者提問，當被問及官司及十姑娘時，他立即臉色一沉及加重語氣地說：「我上到法庭呢，第一，我會尊重法庭，所講就無可奉告。」但他話鋒一轉，「不過既然你咁賞面個個來支持，我呢，都想輕輕講下，好嗎？」
「點解依家先反對」 雖然賭王稱「輕輕講」，但是一開口便一發不可收拾，他一字一頓地稱：「即係成日呢，搞埋咁禁制令，對於澳門的發展好有影響，有咩用？全部都係垃圾！」
「可以講畀你聽，你依家啊，十姑娘，我今日唔講佢唔得。我一手捧起佢，佢來到澳門，跟我廿幾年，我一路升到佢做行政董事，除我，最高就佢啦，佢都搵唔少錢，一路相安無事。」
何鴻燊大發議論期間，記者根本無法插嘴，他指十姑娘其中一個不是是與他爭賭權。「直至到特別行政區開放博彩權，當時有廿一間去參選，發夢都估唔到，原來佢靜靜雞夾埋個仔成立間公司去爭，你我點樣向股東交代。想搶我的賭權，政府好公平，唔使一個禮拜，第一批五間落選佢有份。」
賭王愈講愈激氣：「咁到最尾我贏啊，咁股東仍然唔高興啦。你賤格到咁緊要，卑鄙到咁緊要，想搶我賭場，咁梗係開股東大會啦。當然要飛啦，我姊妹都無得傾啦，咪惟有飛佢啦。」
稱愈審得快愈好 他頓一頓：「好啦，飛佢之後，就咩都唔承認啦，依家搞出咁多法庭的事件，佢都變晒，以前佢全部承認，幾十年都未反對過，依家先至來反對，表明好清楚啦！」
賭王站在座駕旁「一輪嘴」不停講，來自港澳的記者甚少見到賭王如此動氣及長篇大論「鬧」一個人，而且是一個與賭王血脈相連的人，可見他對十姑娘已完全視為陌路人。他又稱：「老實講，我點會驚佢啊。呢個係法治之區，愈審得快愈好，唔好阻住晒！」最後，何鴻燊顯出「永不言敗」的氣魄，笑稱從未打輸官司，他登上座駕後，與記者揮手道別，面色隨即又變得陰沉。