絲絲講場:寶刀未老蔡太出手幫客賺多個零


2018-03-14 07:00

跟蹤提及過的人和物:

上一則新聞: 燃氣股毛利勢受壓

 

股壇老行尊蔡陳葆心(蔡太)快將87歲,但絕對寶刀未老!早排市旺,佢幫客賺咗唔少錢,有個客嘅倉由幾十萬元,滾到成三百萬元!嘩大嗱嗱賺咗咁多倍,究竟蔡太有乜秘技?

每日都返證券行



蔡太早排同絲絲講,話自己已經86歲,今年生日後就87歲,笑言自己冇乜記性,呢頭放咗啲嘢喺度,下一分鐘就唔記得放咗喺邊!但佢話對股票就仲記得好清楚。

佢依家每日仍有到證券行返工,一講到股票,蔡太就眉飛色舞。佢話,早排個市大旺,佢更加係幫客賺咗唔少錢。

換貨轉揸「靚股」



好似有個客嘅倉原本只值幾十萬元,但佢喺客同意下就幫個客換走啲「衰股」,換入啲「靚股」。佢直言,莫講話市升,就算係股市牛皮,啲靚貨都唔怕買。就係咁,換吓換吓貨,個客嘅倉就由幾十萬元,滾到成三百萬元!佢又有另外個客,個倉原本只有15萬元,市旺下又升到30萬元。一個字,勁!

原來秘技係要換貨!咁邊啲係「衰股」?邊啲算「靚股」?蔡太冇同絲絲講,不過大家都知,蔡太一直係「獅王」(滙豐控股,00005)同香港交易所(00388)嘅長情股東,佢係咪幫客換入自己嘅「愛股」,絲絲就唔知喇!

蔡太仲話,雖然個市呢排有啲波動,但佢睇牛市未完,呢個回合仲有得玩吓(口架)!喂仲唔睇吓個倉有咩要換!

余絲韻

贊助商:

討論:
分享: