政情:彭子傑籲政府多支援


2018-03-14 07:00

跟蹤提及過的人和物:


上一則新聞: 政情:九成兒童打針喊 陳以誠:家長太呵護

 

近年香港嘅動畫製作人才輩出,更不時奪得國際獎項,然而港人一講起卡通動畫,仲係覺得日本先至係世界上數一數二嘅動畫大國。早前喺一個活動上見到香港數碼娛樂協會主席彭子傑,佢話日本嘅卡通動畫之所以咁強勢,其實係同電視台呢個傳播媒介大有關係。

彭子傑話日本嘅動畫業有幾條發展路徑,而電視台就係好重要嘅一環,因為當地嘅法例有規定電視台須預留時段播放日本製作嘅卡通動畫,於是本土製作嘅動畫就得以藉黃金時間登堂入室,以致街知巷聞;而內地亦有倣效日本,要求電視台播放國產卡通以扶掖動畫發展。反觀崇尚商業自由嘅香港,廣播條例就欠此規定,商營電視台為求收視保證,傾向播放外國動畫。

環境唔同難照搬日本做法



由於香港同日本嘅環境唔同,佢唔會強求香港照搬日本嘅做法,但本地嘅動畫業界應該得到更多嘅支援同鼓勵,以日益提升製作水準。佢仲話香港動畫多次揚威國際,足證本地動畫業臥虎藏龍,有潛力成為地產同金融之外另一香港經濟支柱咁話。

贊助商:

討論:
分享: