政情:八網難逃:林正財西裝Look踩單車


2018-03-14 07:00

跟蹤提及過的人和物:


上一則新聞: 政情:彭子傑籲政府多支援

 

眾所周知,身兼行政會議成員嘅安老事務委員會主席林正財係單車迷,勢估唔到佢喺室內做運動都揀踩單車,仲要喺着住套老西同皮鞋去踩呀!

佢尋日喺Facebook上載咗呢張相,仲留言話「運動就係把握每一刻」。其實林正財好鼓勵「老友記」做運動,無論室內或者室外,總之有時間就郁吓,唔知佢係咪想以身作則,但又趕得滯,所以冇換衫、換鞋就踩單車嘞!但呢個Look就認真搞笑。

話時話,點解佢咁鍾意踩單車?其實佢日前喺Fb上載咗一段短片,佢自爆細個嘅時候係踩爸爸嘅單車嘅,但丟低幾十年後,喺五、六年前先再踩番,佢仲選擇咗踩公路賽,所以自己訂下目標每星期要踩二百公里,即係大約踩七至八個鐘頭左右。

唔傷膝頭籲老友記多踩車



佢仲話踩單車嘅好處係一來唔太傷膝頭,二來可鍛煉心肺功能,對「老友記」係好好嘅運動,可以按自己體能踩快或踩慢,持以之恒對身體好。唔得閒出去踩單車咩,佢建議喺每日都喺室內做一小時運動。可能就因為佢尋日冇時間出去踩,所以咪出現呢個場面囉!

贊助商:

討論:
分享: