政情:周庭年宵踩場嗌早抖 陳家珮叫回頭是岸


2018-02-15 07:00

跟蹤提及過的人和物:

上一則新聞: 政情:術數師:狗年官場爭鬥 或有局長下台

 

唔少政黨都喺維園年宵擺攤位,立法會港島選區補選候選人、新民黨陳家珮尋日喺該黨嘅年宵攤位同市民接觸,殊不知第一個接觸嘅係香港眾志常委、被取消參選資格嘅周庭,佢着住一件印住「早唞(抖)啦你」同幾個建制派議員「瞌眼瞓」樣嘅圍裙踩場,叫陳家珮同佢啲支持者「早抖」,而陳家珮亦回贈「福」字揮春,叫周庭回頭是岸。

互贈揮春寸對方



除咗用條圍裙寸陳家珮之外,周庭仲準備咗兩張揮春「旗海飄揚」、「芳蹤杳然」送畀陳家珮,笑佢啲街站成日都冇人,淨係插兩支旗就當自己落咗區,完全「影都冇」,啲市民想搵佢都唔知點搵,而陳家珮就話港島區都好大,自己已經周圍去,例如今朝就去咗香港仔,但始終唔識「分身」,咁咪惟有靠啲義工幫手囉!

周庭跟住提到陳家珮推咗好多外媒訪問,點知都未問佢係咪因為英文差,陳家珮就隨即反擊:「係咪同你好熟嗰啲日本傳媒?」周庭解釋話除咗日本,仲有好多歐美媒體,陳家珮即刻斬釘截鐵咁話,如果當選就一定會接受晒所有媒體嘅訪問,仲即刻回贈一個「福」字畀周庭,話香港依家最重要係一團和氣,祝周庭回頭是岸!

港島區補選嘅候選人仲有南區區議員區諾軒、獨立嘅伍廸希同「維園阿哥」任亮憲。

贊助商:

討論:
分享: