政情:新東爆選舉呈請 方國珊范國威又要撲水


2018-02-03 07:00

跟蹤提及過的人和物:

上一則新聞: 中環出更:立會質詢衝擊區會事件 黃國健疑似爆粗

 

喺香港參加選舉,若當選或獲得一定有效票數可獲選舉事務處資助,不過根據《立法會條例》,如果有人提出選舉呈請書,候選人就要等呈請書有裁定結果先可以拎番。喺二○一六年嘅立法會選舉當中,香港島、新界東同新界西都分別有人提出選舉呈請,但由於呈請書結果仲未有定案,所以至今都冇人拎得番資助,包括曾參選嘅工聯會鄧家彪、方國珊同埋新民主同盟嘅范國威。三人最近都報名參加新東補選,點知又有人打算提出選舉呈請,分分鐘兩筆資助都未拎得番時,三人又要再使一大筆錢參與換屆選舉喇。

今次立法會補選牽涉三個地方選區,港島區同埋新界東都分別有參選人被取消參選資格,當中原本有意參選新界東但被取消參選資格嘅沙田區區議員陳國強,表明會提出選舉呈請,而另一位被取消資格嘅獨立本土派劉頴匡亦有意提出選舉呈請。

鄧家彪有兩大水喉射住唔使呻窮



根據過往紀錄,建制派嘅參選人一向都有政黨支持,財政壓力唔大。鄧家彪今次有工聯會及民建聯兩大水喉射住,相信佢就算資助被扣住都唔會呻窮。至於方國珊同埋范國威,喺前年選舉中兩人都要自掏腰包參選,其中方國珊仲講過用埋自己嘅「姑婆本」參選。至於范國威雖然有選舉捐贈,但結果都要倒貼九十幾萬元,睇怕兩人今次又要倒貼,分分鐘選到窮。

周庭料提出呈請選票資助有排等



至於港島區方面,一直宣稱主張香港主權應歸還英國嘅賴綺雯,喺上年九月申請終止選舉呈請,亦獲法庭批准,所以前年參選港島區嘅人士終於可以拎番資助。但係香港眾志常委周庭喺今次選舉中被取消資格,預計佢可能會提出選舉呈請,所以兩次都有份參選嘅新民黨陳家珮,到時又要等一排先拎得番啲錢喇。

有份參選新界東嘅候選人仲有前民主黨成員黃成智、獨立人士陳玉娥同埋獨立人士趙佩玉;而參選港島區嘅仲有南區區議員區諾軒、獨立人士伍廸希,同埋有「維園阿哥」之稱嘅任亮憲。

贊助商:

討論:
分享: