絲絲講場:債王論市金句超出位


2018-01-13 07:00

跟蹤提及過的人和物:

上一則新聞: 簡訊一覽

 

「債券大王」格羅斯(BillGross)撰寫嘅投資筆記向來都好吸睛,而佢最新發表嘅言論就引起市場唔同嘅回響。債王周四再評論債市步入熊市,但今次就話:「債市好似男人一樣,都處於熊市」。此語一出,真係令市場人士唔知佢想講乜。

言論古怪揀股問愛貓



其實債王向來評論市況都喜歡借用一啲新鮮嘅生活故事嚟做比喻,而且經常會被形容為言論滑稽。今次格羅斯話「債券好似家陣全球嘅男人一樣,都處於熊市」,原來係用今時今日男性地位去比喻債市,佢仲替男性講好說話:「男性亦具有一些積極嘅特質,好似當籃球運動員就算Miss咗一個罰球,仍然會得到所有隊友低調嘅GiveMeFive!」

其實格羅斯以前都講過好多古怪言論,例如,喺一三年八月時,佢將當時債券被拋售嘅慘況,與第一次世界大戰中最慘烈嘅索姆河戰役(BattleofSomme)相提並論。而上年一月佢就寫咗一首詩叫做「來自非洲的回響」,將市場比喻為非洲,講吓佢對市場嘅感受等等。

之不過,當中最特別嘅言論一定喺格羅斯用佢以前隻愛貓阿Bob揀股嘞,原來債王透露佢成日問阿Bob有關寵物食品股嘅意見,阿Bob喵一聲就係唔好,喵兩聲就係好。哇,咁都得?可惜阿Bob喺一四年去世,搞到格羅斯幾咁傷心。

債王又透露點解喺○九年三月時會剃晒自己嘅鬍鬚。「我媽媽總係覺得有鬍鬚嘅男人蠱蠱惑惑,只不過她從來冇見過同我共事嘅兩個大鬍鬚佬埃里安和麥考利啫。佢哋兩人嘅媽媽對鬍鬚就完全冇問題喎,可能係因為我媽媽睇得太多鬍鬚偵探嘅電影啩!」

余絲韻

贊助商:

討論:
分享: