政情:鄭松泰辱國旗失教席 戴耀廷陳健民騰騰震


2018-01-13 07:00

跟蹤提及過的人和物:

上一則新聞: 中環出更:陳家珮中環揀選舉戰衣 空手而回

 

熱血公民立法會議員、理工大學應用社會科學系導師鄭松泰前年喺立法會會議廳內,涉嫌將建制派議員枱上嘅五星旗及區旗倒插,早前被裁定侮辱國旗及區旗兩罪罪成,合共罰款五千元。雖然鄭松泰唔使入獄,但理大就成立紀律委員會跟進事件,尋日理大就裁決唔再同佢續約。鄭松泰侮辱五星旗及區旗都搞到教席不保,同樣喺大學任教嘅違法佔領行動(佔中)發起人戴耀廷及陳健民,亦隨時因為佔中案判決而導致教席不保,唔知兩人會否騰騰震呢?

冇得教書「雪藏」至約滿



理大紀律委員會對鄭松泰的紀律裁決,指鄭嘅行為及定罪,同大學承諾嘅優質教育、接受國際化嘅方向唔一致,所以喺鄭松泰今年六月約滿之後,校方唔會再同佢續約。鄭松泰自爆,話收到系主任嘅來電,話佢喺下周一開新學期時,會被安排做另外嘅工作,本來要教嘅科目亦冇得教落去,直至約滿為止。咁嘅安排,即係要將鄭松泰「雪藏」到約滿後踢佢走。鄭松泰就對校方裁決有晒心理準備,但認為解僱理由非常可笑。

另一邊廂,戴耀廷及陳健民分別擔任香港大學法律系副教授及中文大學社會學系副教授,喺違法佔中案件未開始審理之前,其實唔少人包括立法會議員何君堯已經多次去信港大,鬧爆戴耀廷鼓吹違法佔中及「違法達義」口號,扭曲下一代對法律概念嘅理解,要求校方將戴耀廷「炒魷」。大專院校通常會在教職員罪成後才啟動紀律程序作跟進,如今鄭松泰事件已成為「案例」,相信戴、陳除咗要承擔刑責,教席都隨時不保,睇嚟都要執定包袱喇。

劉國勳倡院校參考判決



當日有份舉報鄭松泰倒插五星旗及區旗嘅立法會議員劉國勳,對理大不與鄭松泰續約表示贊同,他認為大學老師為人師表,應以身作則教學生尊重國家。劉國勳話,鄭松泰被判罪成,有損學校形象之餘,仲對學生造成不良影響,仲話戴耀廷公然策劃違法佔中,喺一定程度上同鄭松泰嘅事件性質相同,甚至更嚴重,社會應該引以為戒、各大專院校應該參考判決,以儆效尤。

贊助商:

討論:
分享: