政情:發展局傾開位 葉劉Ann姐「駁」出火


2018-01-13 07:00

跟蹤提及過的人和物:

上一則新聞: 政情:鄭松泰辱國旗失教席 戴耀廷陳健民騰騰震

 

立法會人事編制小組委員會尋日開會,討論發展局同規劃署合共開設三個首長級職位嘅建議,其中發展局個位主要負責處理土地供應、棕地發展同活化工廈等政策。有多名議員就項目申請發言,但大部分都係追問相關政策嘅進度同細節,而唔係問緊點解有需要開設有關職位,搞到向來重視開會效率嘅小組主席葉劉淑儀有啲唔耐煩。

輪到民建聯議員「Ann姐」蔣麗芸發言時,佢又要求出席官員講解港府嘅棕地政策,葉太終於忍唔住提佢,話特首同多位官員,都已在不同場合交代過棕地政策,認為有關問題應交畀立法會發展事務委員會討論。Ann姐隨即反駁,自己唔係發展事務委員會委員,又反問葉太:「特首講過就唔使問?」認為議員須互相尊重。葉太就冷冷地回應話「我好尊重你」,冇再同Ann姐拗落去。

最後只通過一組申請



兩個小時嘅會議結束後,只係通過咗發展局同規劃署呢一組申請,仲有另外五組開位建議排緊隊,按照咁嘅進度都唔知幾時先傾得晒,又難怪葉太咁心急嘅!

贊助商:

討論:
分享: