企業曲線撐分裂 萬豪激起千重浪


2018-01-13 07:00

跟蹤提及過的人和物:


上一則新聞: 寒流不及人心冷 虐兒暴行不可再

 

俗語有云︰「入鄉問禁,入廟拜神。」好似萬豪酒店咁,去得中國賺人仔,居然亂踩國家主權不可侵犯嘅紅線,結果咪搞出個大頭佛,吃不了兜着走囉!

話說萬豪酒店嘅官方中文網站,早前被揭喺問卷調查上,將港、澳、台及西藏地區,同中國大陸並列作「國家」,被有關當局勒令封網整改,大批網民呼籲抵制,集團高層見勢色唔對,極速跪低兼補鑊,重申「支持中國主權及領土完整」之餘,為傷害中國人民感情「誠懇道歉」云云。

咁就奇嘞,地球人都知港、澳、台、藏地區係中國不可分割一部分,就算班老外移民火星啱啱返地球未瞓醒,當地仲有班中國籍高管,明明知道注明「國家及地區」就可以解決,點解仍然犯咁低級嘅錯誤?再講吖,一次半次就話,繼萬豪之後,多間外企被揭發類似問題,遍及航空公司、服裝連鎖店以及醫療科技等各行各業,咁又點解釋?

仲有最蹺蹊嘅係,萬豪呢頭出事,嗰頭居然喺Twitter上,為「感謝萬豪喺用戶調查中將西藏列為『國家』」嘅貼文點讚,道歉有幾多誠意不問可知。再睇埋《新聞周刊》、美聯社等美國媒體,對企業錯誤輕描淡寫,反而大肆渲染所謂「爭議」問題。呢鑊嘢有冇外部勢力背後搞鬼,畫公仔仲使畫出腸咩!

正如外交部發言人話齋,在華經營嘅外國公司尊重中國主權及領土完整,遵守中國法律,係最基本嘅要求。今時唔同往日,十三億市場規模效應宏大,誰靠誰唔使多講。谷歌當年一句「不配合中方作惡」夠霸氣喇啩,依家咪又係要低聲下氣(舌累)返番中國市場。

外國企業唔知碇都話吖,部分港企竟然都係一擔擔,有啲仲要係新聞機構,咁就唔係一句「無心之失」可以吟得甩!例如《南華早報》網站嘅「我的帳戶」一欄,「國家」就包括香港;而《明報》網站會員專區裏面嘅「國家」選項,亦有香港、台灣及西藏可供選擇,結果畀人踢爆至急急補鑊。兩間傳媒,一間易手「紅色資本家」,居然喺國家民族大是大非問題「把關不嚴」,固然耐人尋味;另一間扮晒中立,實際上抹黑國家劣迹斑斑,早被視為「黃媒」,則可謂「事出有因」。年前領導人訪港,黃媒就被指為營造「擾民」假象,夾硬將中環嘅照片當成領導人下榻嘅灣仔,今次事件係咪有人暗撐港獨,大家自己諗吓喇。

始終都係毛伯伯講得啱︰誰是朋友,誰是敵人,係革命嘅首要問題。邊個愛國愛港、堅持同漢奸賣港賊鬥爭,邊個偽君子陰陽怪氣暗中拆台,阿爺至緊要帶眼識人!

贊助商:

討論:
分享: