中環出更:陳家珮中環揀選舉戰衣 空手而回


2018-01-13 07:00

跟蹤提及過的人和物:

上一則新聞: 中環出更:博物館融入生活 天價藝術玩平民化

 

立法會四席補選下周二就開始接受提名,但有意參選港島區嘅新民黨南區區議員陳家珮(Judy),早個禮拜竟然仲有時間一個人喺中環行街睇衫,原來佢係想揀番幾件搶眼啲嘅「戰衣」,供將來出席選舉論壇及落區拉票時着,可惜揀咗一輪都係空手而回。

卓妮上周五下午喺中環國際金融中心二期,見到Judy一個人行嚟行去,先後入咗幾間時裝店揀衫,而且專揀啲顏色鮮艷嘅女裝大褸。不過,佢睇完一間又一間,行完一層又一層,搞咗成粒鐘都好似唔啱心水。期間佢乘坐扶手電梯落下層時,有兩個小學生奔跑撞到Judy,Judy就笑笑口咁應對,冇因為買唔到戰利品而黑面。卓妮事後向Judy查詢,佢透露近期天氣轉冷,自己啲舊大褸顏色較沉,因此想搵番件鮮色啲,例如係紅色嘅大褸作為選舉戰衣,可惜呢期啲秋冬女裝都係以深色為主,最後揀唔落手。

葉劉借幾件褸畀佢頂住先



不過Judy透露,由於佢同新民黨主席葉劉淑儀嘅身高相若,對方又出名識得揀衫着,葉太已借咗幾件褸畀佢頂住先。葉太近年多次參選立法會都高票當選,其戰衣可能沾到好運,Judy當然唔介意着佢舊衫喇!

卓妮

贊助商:

討論:
分享: