中環出更:搞紅盤宴望高開 陳振彬變股海明燈


2018-01-03 07:00

跟蹤提及過的人和物:

上一則新聞: 綠色先鋒:英大學研究:海洋生物可分解塑膠廢料

 

尋日係港股喺二○一八年首個交易日,恒生指數已報三萬零五百一十五點,升幅創逾十年高位,而健康快車香港基金今年再度喺元旦舉辦富貴吉祥紅盤宴,希望今年股市繼續紅盤高開,果然中晒。身兼健康快車名譽主席嘅觀塘區議會主席陳振彬就變身股海明燈,話到咗一八年尾至一九年頭就要提高番警覺,因為到時美國加息,加到第三次嘅時候相信會有唔少影響。

陳振彬希望新一年香港經濟繼續向好,仲話相信上半年經濟都應該會發展得唔錯,但到咗年尾要特別留意科技同房地產基金,因為呢兩個行業最受美國加息影響,尤其係科技行業較新興,好多公司都係問銀行低息借錢,然後將大部分資金投放入市場,若果加息會令呢啲公司難以短時間回本。

鄭錦鐘睇好今年經濟



保良局前主席鄭錦鐘亦睇好今年經濟,話雖然依家股市升得好厲害,但依家同九七年唔同,經濟基礎健康咗好多,所以相信整體都會向好發展。提到佢個仔鄭泳舜參選立法會補選時,話唔會主動幫個仔,因為唔想個仔「靠父幹」,靠自己努力多啲。

健康快車名譽會長、民政事務局前常任秘書長李麗娟(媽打)同東區區議會前主席丁毓珠都嚟撐場,媽打話同陳振彬、丁毓珠相識逾廿年,因為觀塘同東區都係人口比較多嘅區,要處理嘅事比較多,所以佢退休前就經常同佢哋合作,仲大讚佢哋好幫得手,令佢嘅工作可以輕鬆啲同舒服啲喎。

丁毓珠盼人人有屋住



至於新年願望,媽打話一七年都過得唔錯,希望今年都係一樣;而丁毓珠就希望「人人快上樓,個個有屋住」!

講番紅盤宴,健康快車創會主席方黃吉雯話已經搞咗十八年,而食盆菜亦要跟上潮流,尤其近年倡議少油鹽糖,所以佢哋嚟緊都會循呢個方向去修改食譜,希望食盆菜都可以食得健康啲喎。

卓妮

贊助商:

討論:
分享: