政情:明哥獲頒嶺大院士銜 冀培養年輕人正能量


2017-10-13 07:00

跟蹤提及過的人和物:

上一則新聞: 政情:楊偉雄否認被架空 唔熟書又獻醜

 

嶺南大學尋日頒授榮譽院士銜予五位傑出人士,包括喺深水埗派愛心飯盒而廣為人知嘅陳灼明(明哥)。明哥直言好開心,因為佢冇讀完中學,今次係第一次獲得大學頒授榮譽銜頭,覺得好榮幸。

明哥話起初唔知榮譽院士係乜東東,後來學校老師話畀佢知,想攞到呢個榮銜要經過好嚴謹嘅審批程序,同埋對社會要有好崇高嘅貢獻,所以明哥覺得好難得。

佢又希望帶更多年輕人參與佢嘅義工活動,培養年輕人嘅正能量,事關要用個心幫助社會,先可以成為真正嘅社會棟樑。目前九大院校都好積極同佢聯絡,希望學生可以參與派飯或做義工,不過由於社會各界反應太熱烈,想做義工都要排到十一、十二月份嘞!

除咗明哥之外,獲頒榮銜嘅仲有綽號「牛丸」、有「亞洲足協年度最佳女教練」美譽嘅陳婉婷、永隆銀行第三代後人伍尚敦、東華三院前總理何世堯同埋資深銀行家袁光銘。

贊助商:

討論:
分享: