政情:姚羅棄東華 葉劉不攻「頂」中西區混戰變隻揪


2017-10-13 07:00
上一則新聞: 中環出更:漢奸黎密會攪局三句鐘 陳日君有份

 

已定於十一月二十六日舉行嘅中西區區議會東華及山頂選區補選,提名期將於下周一結束。曾表態有意參戰嘅立法會建築界前議員姚松炎同「中西區規劃及保育街坊聯盟」成員羅雅寧,尋日一齊發表聲明表明唔會參選,以免多個非建制落場爭位,令建制派漁人得利,而身兼行政會議成員、立法會議員嘅新民黨主席葉劉淑儀亦以時間倉卒為由,宣布放棄攻「頂」。換言之,兩個補選由混戰變回建制派同民主派「隻揪」。

東華選區暫有民主黨伍凱欣同小學校長呂錦強報名,姚松炎同羅雅寧尋日一齊發聲明話唔參選,理由係避免出現「非建制之間的對陣」,變相益咗被指獲建制派支持嘅呂錦強。

以免分薄票源益咗對家



至於山頂區補選,暫有教育局前政治助理、自由黨楊哲安報名,來自民主派嘅「2047香港監察」召集人錢志健則正在收集選民提名。之前講過有意參選山頂區嘅葉劉淑儀,尋日亦召開記者會公布棄選。據悉,葉劉棄選嘅原因係以免分薄建制派票源令錢志健漁人得利。

換言之,中西兩區補選極可能只有建制派及民主派各一人參選,由混戰變回「隻揪」。

被問及點解放棄攻「頂」?葉劉淑儀話雖然好想參與補選,但經諮詢黨內領導後,認為目前並非適合時機,因立法會復會後工作較為繁忙,以及補選時間比預期早,因此認為不夠時間作準備。不過,佢話唔排除會參與二○一九年區議會選舉,至於選區方面則未有決定。

其實,同為行會、立法會飲食界議員兼自由黨主席張宇人,早前陪同楊哲安報名參選時,曾暗寸葉劉咁得閒做區議員。而葉劉亦透露,女兒同自由黨都有勸退佢,更講笑咁話:「成日叫我唔好選就係廚房佬(意指張宇人),你知啦有把刀嗰個,日日見到我喺八樓(二人喺立法會辦公室的樓層)都哦住我」。佢又話張宇人希望佢幫忙為該黨參選人楊哲安拍照,佢就話會考慮為自由黨助選,至於投票意向則保密。

贊助商:

討論:
分享: