呻窮清算家人 張栢芝 自爆被欺負18年


2017-07-12 20:39

跟蹤提及過的人和物:

上一則新聞: 日本黑寡婦坦承 毒殺第四任丈夫

 

張栢芝 向來疼錫家人又顧家,入行十多年以來,對姊弟們的支持出錢又出力,對父母更加做到一百零一分,父母離婚各自有不同家庭,栢芝依然孭上身,一人獨力撐起幾頭家十多年,一直無怨無悔﹗栢芝近來卻在社交網開設帳戶大吐苦水,自爆被欺負十八年,啞忍多年谷到爆,對至親作出大控訴,在家中肩負大水喉角色的栢芝,拒再無限量供水。轉個頭栢芝卻奴性不改,走去領養三隻貓咪,深信養貓好過養人﹗

延伸閱讀:





張栢芝 絕跡香港娛樂圈多年,轉返內地發展,工作都以遷就兩子時間行先,搵錢機會不復當年勇,但仍要為父母姊弟幾頭家擔憂,心力交瘁。向來冇在社交網開設正式帳戶的張栢芝,上月尾突然開戶瘋狂出po,突然貼出父親跟親友的合照,留言「多謝你畀我勇氣,唔該晒你勇哥 (張父張仁勇,又名鬍鬚勇) 」以為佢感激張父,點知下面留言爆seed「其實都忍咗好耐㗎啦,估唔到爆出嚟之後,所有身邊朋友都極度支持我……他們冇諗過我一直活喺一個咩世界入面……」之後又以英文留言「no one can stop me……no one can beat me even」,看來栢芝忍無可忍,要一鑊過爆發。

栢芝又出一段舊日跟細佬張豪龍的合作片段,留言話:「佢 (指細佬) 一定係諗家姐畀人欺負十八年,自己乜都做唔到」,栢芝自爆被欺負十八年,正是佢入行之時。

 

撐住幾頭家的栢芝,不吐不快,最近post中又指自己冇錢請造型師及買靚衫,只能穿舊衫及請化妝師拍膊頭幫拖。大呻冇錢的栢芝,在香港住大埔康樂園獨立屋,加拿大和新加坡都有物業,突然呻窮似乎想一刀切,拒再無限量接濟家人。

栢芝決心拒再做大水喉後,心情立即變輕鬆,連日在IG玩直播,透露突然想養貓,回港第一時間處理領養事宜,並一口氣領養三隻貓。日前栢芝出動到愛護動物協會辦理手續,領取其中一隻白色灰紋英國短毛貓後,立即將家中新成員帶去寵物店沖涼,之後再去買電腦,出巡大半天返回大埔寓所。

 

栢芝自爆專一,連家中電腦都是十多年、婚前買下,直至近日壞機,才去買新。呢日栢芝出發到銅鑼灣蘋果店買電腦,司機拎一袋自己孭一袋,滿載而歸。見到今年37歲、生咗兩個仔的張栢芝keep得唔錯,着住一條激短熱褲露腿出巡,都依然吸睛喎!

栢芝除了養貓成癮,近日非常沉迷網絡世界,不但在家中、車上、街上,無時無刻玩直播,更貼相出po,在IG開設帳戶僅三星期,已吸納1.4萬粉絲,難怪日拍八條直播,勤力過網紅。栢芝所分享相片當中佔了一半是今年10歲Lucas (謝振軒) 和7歲Quintus (謝振南) ,兩子愈大愈靚仔,Lucas跟栢芝一樣愛上滑水而且滑得有水準,又晒兩子講普通話,大讚兩仔「大個仔,叻過自己」,刻意為兩子減產的栢芝,睇得出好努力keep住人氣。

延伸閱讀:

贊助商:

討論:
分享: