心穎猴擒翹馬國明搶住「嫁」


2017-01-19 07:00
上一則新聞: 馮盈盈狂敷Mask保靚樣

 

馬國明昨日宣傳新劇時獲「皇帝」馬浚偉賜婚,緋聞女友黃心穎不但即刻仆出嚟認頭搶住「嫁」,表情Sweet到爆的她更翹實馬國明隻手唔放,擺晒緋聞上枱!而馬國明亦直言攞正牌「拍拖」夠晒開心!

藝人馬浚偉、馬國明、蕭正楠、胡定欣、周秀娜、劉心悠和黃心穎等昨日在將軍澳電視廣播城出席無綫新劇《宮心計2深宮計》記者會,期間飾演皇帝的馬浚偉「下旨」命馬國明成家立室,猴擒的黃心穎聞言即仆出嚟翹住緋聞男友馬國明隻手,Sweet住擺緋聞上枱!

攞正牌「拍拖」



受訪時,問開劇後會否到對方家中對戲?跟馬國明在劇中有感情線的黃心穎甜爆笑說:「點解要去佢屋企對!應該成日喺公司!(攞正牌拍拖?)多謝小青姐畀機會!」而馬國明對安排直言開心,但問到黃心穎是否他杯茶時,他卻說:「相處吓先啦!」

馬浚偉透露除與胡定欣有纏綿戲外,亦與周秀娜有出浴戲,不過蕭正楠則希望睇到馬浚偉與劇中父親李龍基玩「親子浴」:「父親節就到喇!」又指自己為與馬國明拍出浴戲而減磅:「(畢)啲水落個身度,啲水喺肌肉個罅度流咁!」

周秀娜佗B裝騷胸



至於周秀娜則以V領騷事業線,堪稱全場最性感,她笑稱此乃佗B裝,故令身材顯得豐滿。而劉心悠就「自嘲」平胸:「胸口個領係平!」另外,有指胡定欣想與緋聞男友陳展鵬繼續同住將軍澳區,因而續租原來住處,她即指若置業搬屋就要繼續努力工作:「同埋公司好多同事都住將軍澳啦!」

文:影視組

贊助商:

討論:
分享: