陳逸璇重燃Sing夢


2015-07-11 07:00

跟蹤提及過的人和物:

上一則新聞: 高以翔留鬚考驗女友

 

周星馳有句經典對白是:「人如果冇夢想,同條鹹魚有咩分別!」人如果有夢想,而又不敢去試的話,可能比鹹魚更可悲。歌手陳逸璇(Jolie)由出道至今整整十年,一度放棄唱歌改當模特兒,不過,原來她那團音樂之火並沒隨之熄滅,雖然你不會在電台、電視台這些大眾渠道中看到她的演出,但她一直在酒廊與樂隊演唱着非主流的爵士樂,默默為夢想打拚,為自己而高歌。

時不與我



提起Jolie,或者大家對她的歌手身份有點模糊,但至少聽過《合久必婚》這首歌名。十年前,Jolie甫出道與李克勤合唱《合久必婚》,歌曲當年非常火紅,原以為前途一片光明,但世事難料,公司老闆被廉署調查,公司大地震,最後Jolie隔了年多才再度推出個人單曲,之前的大好形勢被時間磨滅,一切物是人非。

「好錫我嗰個老闆已經唔喺度,而且我當年仲細,待人處事上有待學習,我嘅性格比較倔強又心直口快,好多嘢我唔會諗點包裝,就直接講咗出嚟,加上我又唔夠Aggressive,所以好難喺呢行如魚得水。當年有種挫敗感,覺得自己懷才不遇,我由6歲已經開始唱歌,讀書時參加唱歌比賽經常攞獎,但點解喺娛樂圈唔係呢回事?見到其他人好輕易咁就紅咗,點解自己唔可以咁一帆風順?當年家人唔贊成我入行,覺得我喺美國大學畢業,應該好容易搵到份人工唔錯嘅工,唔明我為乜入行,而且見到我入行後有段時間成日喺屋企喊,佢哋都好擔心。」

改寫命運



之後Jolie放棄唱歌,由歌手轉型拍戲及做模特兒,兩年時間完全不唱歌,甚至卡拉OK也不去。不再唱歌的Jolie發現自己並不快樂,此時遇上改寫她一生的人,就是她的現任丈夫,令她重拾唱歌的樂趣。

「我老公知道我其實好鍾意唱歌,唔唱歌只係一種逃避,有年生日佢送咗一份禮物畀我,係跟ChristineSamson學唱歌嘅十堂課程,自此我再次接觸音樂,跟以前做歌手唔同,我會揀自己喜歡嘅歌,適合自己唱嘅歌,我開始唱爵士樂,同唔同嘅音樂人一齊夾Band。以前我唱歌只着重技巧,冇乜感情,可能人長大咗,有所經歷,依家唱歌會多咗份味道,技巧係要訓練,但我會以心靈行先,唔會去諗個高音位去唔去到,音樂係傳遞感情,觸動人心靈,就算你技巧再好,唱得幾完美,但無感情都係冇用,如果冇靈魂,就失去咗音樂嘅意義。近幾年我從頭學起,慢慢知道咩係音樂,我自學結他、打鼓、Ukulele,依家開始自己作曲,十年前我以為自己已經Ready,原來我依家先係Ready。上天自有安排,你要經歷一啲挫折,先可以有一番體會。」

誓鬥長命



去年年尾Jolie舉行小型音樂會,已不再拘泥於爵士樂或流行樂,她有意推出新歌,但不會以傳統形式出碟,計劃放上網上平台與眾分享。

「其實我唔需要爆紅,依家可以同唔同嘅音樂人交流、表演,我已經好開心。細個比較短視,只係諗住我要紅,我要出名,但做人最開心係搵到你嘅熱忱,我依家唱歌係為自己開心而唱。有個前輩同我講,喺呢行邊個最後勝利係冇人知,呢行係要鬥長命,你只需要一個機會就可以彈起,最重要係堅持夢想,可能你聽日就成功,如果你只係要個結果,唔享受過程嘅話,咁樣你好難堅持落去,其實最後有乜結果,我都唔知,但至少我享受咗個過程,如果有好事發生當然好,但如果冇,其實都冇問題。我相信每個人都應該堅持自己夢想,你唔會知呢條路有幾長,要行幾耐,但只要係你鍾意嘅嘢,你將來就唔會後悔。」

Jolie,加油﹗



人生的路途,沒人應許常晴無雨、大路平坦、沒有山阻、不遇苦難及試探,要持定信念及夢想,談何容易,或者我們沒能堅持到最後,但至少可以為努力中的人說聲加油!

文:陳嘉敏

攝:吳文聰

場地:FlowerMusic

贊助商:

討論:
分享: