Wyman戥徐濠縈急:再唔生就閂門


2015-04-18 07:00
上一則新聞: 張衞健曾霉到險破產

 

徐濠縈熱愛跑步,更跑到去外國,連露營都走到日本,阿徐雖然努力跑步,但直言如果有BB就會減少跑步,難怪好友黃偉文(Wyman)都有預感阿徐會生第二胎,更戥阿徐心急:「生啦,再唔生,閂門喇!」

潮人徐濠縈、黃偉文(Wyman)、模特兒伍靜麗(Angie)、設計師何志恩、邢嘉倩等前晚出席時裝酒會,徐濠縈表示剛回港,上星期與朋友去日本露營:「三日兩夜冇得沖涼,天氣得三度,又橫風橫雨,一早起身見到富士山景,好靚。(叫埋老公同囡囡去?)Eason想去,囡囡話驚,但都想囡囡去體驗吓。」

有咗先減少跑步



提到剛誕下B女「梁浸浸」的鄭希怡(Yumiko)?她表示未去探BB,但已看了相大讚BB好可愛,眼細細似上海妹。問到有否過兩招湊女?她表示:「佢識喇,反而佢有問我教女,不過等大啲先啦!(幾時到你生?)快啲變畀我。(努力造人?)冇,努力跑步,有咗先減少跑步。」

送歌詞全套服務



Wyman表示未去探好友Yumiko,但會幫「梁浸浸」揀衫,Wyman曾寫歌詞作Yumiko結婚禮物,他直言想做「全套服務」,寫首BB歌詞送給Yumiko,希望一直寫到Yumiko做外母。他透露平時幫人改名多,寫BB歌就未試過:「朋友未生嗰啲我已經諗好晒名,梁漢文叫梁爽,蘇永康要生兩個,叫Sofar同Sogood。(幫徐濠縈未生嗰個諗定?)生Constance(徐濠縈女兒陳康堤)嗰陣已經諗咗一大堆,生咗先講,我有預感佢唔只生一個。(生仔?)仔女都冇所謂,佢哋開心。生啦,再唔生,閂門喇!」

另外,真空上陣的Angie表示沒有用乳貼,自己平時都不愛戴bra,平時男朋友亦不會介意工作要性感。她亦透露媽咪上圍有F級,姐姐有C級,更自嘲是負A級。

文:名人組

贊助商:

討論:
分享: