政情：唐唐怕上電台爆戀情

2012-02-11 15:00

特首參選人梁振英早前接受知名娛樂電台節目主持查小欣訪問，大爆同太太嘅感情生活，尋日又輪到泛民特首參選人何俊仁（鐵頭仁）上去講情史，咁另一參選人唐英年呢？據查小欣嘅講法，基於公平原則，佢當然有邀請唐唐啦，但對方就話嚟唔到喎。呢個節目有咁多聽眾，唐唐都放棄呢個接觸市民嘅好機會，唔通佢擔心畀查小欣就感情缺失同私生子傳聞問到口啞啞？

講番鐵頭仁，尋日佢自爆為人唔浪漫，結婚度蜜月都帶住書同原稿紙寫稿。婚後佢負責對外，太太負責內政，例如買樓、裝修、啲家用點使，全權由太太決定，唯獨係仔女嘅學業，佢就點忙都堅持參與。對於今次參選特首，佢太太同仔女嘅支持度好似只屬一般，個仔話佢參選係「攞嚟辛苦。」