領匯車場爛蓉蓉
2012-02-10 15:00
跟蹤提及過的人和物:
上一則新聞: 大道之行：投資未來乏善足陳
「嘩！咁都得？咁殘嘅停車場都係第一次見！」楊先生早前擬將座駕停泊於筲箕灣愛東邨停車場，甫進入車場範圍即發現場內殘破不堪，「架車上到一樓即刻嚇死，成層天花嘅油漆一條條咁揈晒落嚟，成個恐怖森林咁！真係太爛了！」楊不滿領匯收取市場停泊費，但提供的場地卻「差過笪爛地」，未能為駕駛者提供合理停泊空間，擔心座駕遭剝落天花毀壞後追討無門。
答唔出上次維修時間
面對天花嚴重剝落，領匯發言人竟表示每日均有安排保安員巡視停車場，檢視場內各項設施狀況，並按個別設施狀況制訂有關維修時間表，若發現設施有維修需要會即時匯報，並盡快安排維修。至於上址油漆剝落一事，發言人指接獲本報轉介後將安排技工維修。不過，被問及停車場對上一次維修時間時，發言人卻未有正面回應。
「點可以咁㗎！收得租就應該畀番個正常合理嘅環境畀人，一個咁嘅場收市場價，真係戥啲租客唔值！」當區區議員顏尊廉直指事涉領匯管理不善，未有妥善管理轄下物業，要求領匯須與外判公司加強溝通及合作，以保持物業及設施有良好狀況。
驗樓師詹濟南解釋，油漆剝落並不罕見，但情況嚴重至此估計「問題係完全冇人理」。詹又不排除問題出現與過去處理工序有誤所致，「用啲油唔靚都會咁，例如將啲水溝埋落啲油度，天氣一潮濕就會出現呢個『起皮』現象。」詹續稱，倘停車場在施工期間監管不善，未有先將底層塵埃掃走即直接上油，同樣會加速剝落。至於修補油漆剝落，詹稱方法相當簡易，「先剷底，再上灰，油番一兩層油上去就可以喇。」故對領匯出現嚴重剝落仍視而不見，詹濟南坦言難以理解。
討論:
| 分享: | |
|
|
|