政情：盧浩宏舖租貴焗「上樓」

2012-02-10 15:00

過去一年通脹升溫，原材料成本上漲，電費又加，舖租升幅更驚人，唔少餐飲業老闆都好頭痕。做火鍋起家嘅福苑集團主席盧浩宏（Howard、圖）話，自己早前同業主傾租金傾到嘔血，最終都係敵唔過被零售業趕絕嘅命運。

Howard早前出席一個新春活動，佢一講到盤生意就皺晒眉頭。原來佢冇幾耐前同業主講數，傾關於銅鑼灣波斯富街地庫嘅火鍋店續租，本來Howard已經好醒咁主動將月租由本來二十萬元提高到四十萬，升幅足足一倍，但都畀某零售業以一百萬元高價截胡。

Howard好感慨咁話，火鍋店喺該舖位做咗十幾年都頂唔住，依家惟有另謀出路，就係選擇舖租較平嘅樓上舖。雖然樓上舖位置對客量唔多唔少都會有影響，但Howard都話冇符，不過佢有信心，只要食物同服務質素好，食客會跟住返嚟嘅。