中環出更：李文斌夫婦忙足兩日樂不疲
2012-02-07 15:00
上一則新聞: 健康有營人：適量運動紓緩關節痛
仁濟春茗緊接晚會
Edmond做善事絕不手軟，前晚《慈善星輝仁濟夜》，佢同太太Amanda悉心打扮亮相公仔箱，佢哋聯同身兼籌委會主席嘅仁濟副主席梁昌明、總理吳國榮、鄧肇殷、馮卓能等齊齊主持亮燈儀式，Edmond仲帶頭捐出二千二百零八萬元善款，相當豪氣，而整晚合共籌得逾五千二百萬元。吳國榮話，成績咁驕人，一眾董事局成員一定要好好慶祝吓至得。
鄧肇殷忙節食修身
數數手指，Edmond一對龍鳳胎已有歲半大，Amanda笑言，一對仔女初學走路，表現活潑，一個愛向左走，另一個向右走，搞到佢索晒氣，唔知追邊個好。尋日仁濟新春酒會，卓妮又見到佢哋兩公婆，期間Amanda同總理、卓悅集團高層鄧肇殷好以情同姊妹咁細聲講、大聲笑。問鄧肇殷最近忙啲乜，佢好認真話忙緊節食減肥，事關近期食得太盡興，要勤力修身至得喇！
仁濟副主席鄭承隆、總理鮑誠業及馮卓能亦同一班後生仔啱傾又啱玩，令仁濟充滿活力。現身酒會嘅仲有醫管局主席胡定旭及新民黨副主席田北辰，田二少係荃灣區議會新科議員，今年第一次參加仁濟春茗，佢話將來會同仁濟多啲合作，一齊為區內市民服務而努力喎。
卓妮
討論:
| 分享: | |
|
|
|