政情：鼠王芬氹囝囝衰度縮

2012-02-04 15:00

小朋友每年生日都希望收到份夢寐以求嘅禮物，好似立法會議員梁美芬（鼠王芬）嘅細仔亦唔例外，去年生日就同鼠王芬講想養狗仔，點知鼠王芬只係買咗幾條金魚就當係生日禮物，諗住囝囝會收貨啦，點知細仔收到份禮物後非但唔收貨，有人仲拋出一句：「每人只得一個童年」，依然堅持想養狗仔喎，結果鼠王芬就範買咗隻約瑟狗畀細仔養，至今已養咗九個月。

不過，鼠王芬治鼠就叻，但養狗仔就唔多掂，最近隻狗仔嘅健康仲麻麻地添。話說鼠王芬喺農曆新年初一至三出咗門，將隻狗仔寄居喺朋友家中，唔知係咪撞啱嗰幾日天氣太凍，隻狗仔早幾日有晚突然嘔吐大作，當時已經係凌晨十二點，鼠王芬都不敢怠慢即時帶狗仔去寵物醫院睇病，好彩經檢查後冇乜事，否則相信鼠王芬個心都會好唔安樂。唔通因為狗仔難養，佢當初先至選擇送金魚？