政情：《辛亥革命》觸動CY淚腺

2012-02-04 15:00
上一則新聞: 政治解碼：組織鐵票討價還價

 

特首參選人梁振英（CY）一向予人好嚴肅嘅感覺，但佢尋日接受電台節目訪問時就主動提到，自己係一個好感性嘅人，有時睇電影同紀錄片都會因感動而落淚，好似之前喺飛機上睇電影《辛亥革命》時就感觸流下男兒淚。至於點解佢咁感性，CY就話鍾意藝術嘅人會感性啲，而佢讀中學時選擇玩中國樂器「秦琴」，因而培養出對藝術嘅熱愛。

宣布參選特首超過兩個月，CY話家人一直好支持佢，又大爆年輕時每晚都會幫幾個仔女吹頭，趁機會維繫親子關係。講到愛情，佢話咁大個人只係拍過一次拖，老婆唐青儀就係佢唯一嘅戀人，當年佢哋分隔兩地，只靠寫郵柬聯絡，因為郵柬只需五毫子，但寄信就要一元三角。不過，佢每月都會豪一次，到大東電報局打長途電話同太太傾三分鐘。CY又首度講到，即使今次選舉落敗，亦會繼續服務社會同國家喎。

孔教澄清未定投唐梁



此外，尋日有報章話十名孔教選委當中，除咗全國政協委員劉夢熊支持CY，其餘九人都會支持同提名唐英年。孔教學院院長湯恩佳澄清，強調佢哋九人仍未決定提名邊個，炮轟有關報章作嘢，今日會去信要求澄清。

討論:
分享: