政情：葉劉遊日向台歌星拉票

2012-02-02 15:00

新民黨主席葉劉淑儀，喺今個農曆新年假期去咗日本北海道充電四日，入住一間環境宜人嘅酒店外，仲食盡當地美食，但就唔及遇見台灣女歌手張清芳咁驚喜。葉太話，自己同張清芳夫婦咁啱住埋同一間酒店，大家認識之餘，仲成功爭取到對方支持添。

今次葉太同幾位朋友一齊去北海道，其中一位係台灣人，佢哋入住酒店冇耐，就遇到張清芳同老公，葉太嘅朋友一眼就認出對方，仲介紹埋畀葉太認識。葉太話，以前都聽過張清芳唱歌，覺得對方歌喉相當唔錯，但近年工作繁忙，的確係聽少咗。

葉太仲透露，原來張清芳同老公已經成為香港永久居民，但就未登記做選民，又咁啱佢手上有幾張選民登記表格，於是咪即場呼籲對方登記囉。佢仲話，張清芳夫婦取過選民登記表格後欣然答應會登記，仲話會支持新民黨咁話。不過，點解葉太會帶埋選民登記表格去旅行嘅呢？