政情：立會雙J秘書長大熱

2012-02-02 15:00

天下無不散之筵席，為咗立法會搬竇一事而再坐一會嘅立法會秘書長吳文華（Pauline）今年九月終於約滿，秘書處今日發出內部通告，聽日開始登招聘廣告，物色下任秘書長人選。現時秘書處內有兩大熱門人選，一位係助理秘書長林鄭寶玲（Justina），另一位就係法律顧問馬耀添（Jimmy）。

呢個位相當於首長級第六級，人工十八萬，做得秘書長條件要有番咁上下，最緊要係熟悉政府同立法會運作，以前試過有政務主任AO投考，結果都鎩羽而歸。

Justina同Jimmy都喺立法會好多年，都好熟悉政府同立法會運作。Justina做過廉政公署，回歸以後已經係立法會助理秘書長，至於Jimmy就係警察出身，兩個人一直都係低調做嘢，做議員嘅後盾。

呢次招聘大約歷時一個月，據聞負責請人嘅立法會行政管理委員希望六月可以請到人，以便有三個月時間交接。