政情：規範鄉委選舉鄉紳驚有蠱惑

2012-02-01 15:00

新界廿七個鄉事委員會去年改選，期間因為鄉委會嘅組成部分、參選資格等問題出現唔少爭拗，為咗規範鄉委會選舉，政府去年底開始同鄉議局商討改革鄉委會，最近仲拋出兩個方案添。原本眾鄉委會領導人對方案冇乜意見，但就因為政府太過急就章，令班鄉紳擔心政府出蠱惑。

政府就鄉委會組成方法拋出兩個方案，第一個係將新界太平紳士、社會賢達等身份特殊人士自動成為鄉委會執委嘅安排剔除；第二個就係容許呢啲未經選舉洗禮嘅人士繼續出席執委會，只有發言權，但冇被選權及投票權。即係話將來鄉委會嘅民主成分會提高，要做執委，唔該先參選。

據了解，眾鄉委會領導人對呢啲方案冇乜意見，但政府就急就章要喺今年三月搞掂，並將草擬好嘅法例交到立法會審議。不過，班鄉紳就擔心法例條文有蠱惑，正爭取研究多兩個月先通過。鄉委會規範法例一旦落實，所有以太平紳士進身鄉委會執委嘅人士就會喪失執委資格。