政情：葉太派利是袁莎妮怕醜

2012-02-01 15:00

香港總商會總裁袁莎妮（Shirley）自從澄清晒婚外情緋聞困擾後，不時出席各項大小活動，尋日又到中總新春酒會湊熱鬧，仲隨心所欲周圍同人打招呼，期間仲有意外收穫，就係收到新民黨主席葉劉淑儀封利是。究竟點解葉太會畀利是Shirley呢？原來佢哋曾經係上司同下屬關係。

葉太自爆，原來Shirley九一年加入政府做AO（政務官）時就跟佢做嘢，當年佢係副行政署長，所以尋日見到舊下屬，於是主動派利是。據聞Shirley收到利是時都有啲唔好意思。其實Shirley唔使對收利是咁怕醜，始終呢個係未婚人士嘅專利嘛。葉太除咗派利是畀Shirley，大家仲傾吓公事。

話說葉太之前同總商會主席胡定旭提起，想到總商會講吓反對競爭法嘅建議，尋日難得見到Shirley，當然乘機跟進下安排成點啦，Shirley即時連聲話安排緊。話時話，葉太有呢個精乖前下屬跟進呢件事，咁就唔使驚件事石沉大海啦！