葉翠翠：父母諗過走佬
2011-11-10 15:00
跟蹤提及過的人和物:
上一則新聞: 羽翹日啪20粒藥吊命
爸爸做消防員，屋企環境都唔錯，係小康之家，所以細個爸爸就送咗我去外國讀書。當時可以話要咩有咩，但係亦培養咗我嘅公主性格，之後去外國讀書就真正遇到磨練。當年嘅英國歧視好嚴重，去到英國讀書試過沖涼畀人整蠱冰水照頭淋、掟煙頭又有、又成日唔見嘢，但係咁樣都好，培養到獨立性格。
攞幾百萬填氹
回歸後，屋企環境突然變差，當年政府推行八萬五房屋政策，想人人有屋住，但係八萬五亦都令好多人陷入負資產，香港經濟陷入低迷狀態。我屋企就係其中一個受害家庭，當年買樓諗住出租，但樓價大跌，四百八十萬嘅樓跌到得番百幾萬，租金亦大跌，冇辦法供得到，銀行追番樓宇嘅差價，一個家庭大拿拿要攞幾百萬出嚟補差價邊度攞到。
經此一役，屋企冇晒錢，當時我仲喺英國讀緊書準備升大學，但係都冇辦法要即刻返香港。講真當時欠銀行太多錢，父母都有諗過走佬返大陸一走了之，但係好佩服佢哋最尾都冇咁做到，繼續留喺香港捱咗十年。屋企因為咁足足負資產咗十年，父母嘅畢生積蓄一次過冇晒，相信當年好多香港人都有咁嘅遭遇，辛苦搵嚟嘅錢供落空氣度，好慘。
打四份工搵銀
屋企因為冇晒錢，由英國返嚟香港讀大學，學費同生活費都要自己諗辦法，嗰陣試過做四份工賺錢，好似喺馬會做接待員、獸醫助護、兼職模特兒、同埋幫人補習，為生活冇辦法，屋企好辛苦過到呢關，我最後亦順利大學畢業。
討論:
| 分享: | |
|
|
|