2010-12-04 15:00

 

華哥發火非同小可！黃日華因《刑警》遭冷待而狂轟無綫，並聲言不稀罕做「視帝」，就連明晚台慶頒獎禮亦言行一致不畀面不出席。昨日監製唐基明表明立場加入力撐這次「杯葛行動」，而男、女主角苗僑偉、宣萱昨亦稱工作在身不會現身，繼台慶後《刑警》再次「隱形」。

無綫《萬千星輝頒獎典禮2010》明晚假電視城舉行，各獎項提名人理應傾巢而出，不過台慶劇《刑警》有過之前遭台慶冷待而被男主角黃日華鬧爆一役後，明晚黃日華與女主角宣萱都不會出席，印證之前所講「唔稀罕攞獎」，言行一致。

監製轟投票不公

其實黃日華在「噴火」後，無綫已馬上安撫，安排他入圍視帝五強及擔任頒獎禮嘉賓，但仍未能令華哥感受被尊重。對於華哥玩「杯葛」不出席頒獎禮，昨得其助手回覆說：「華哥應該唔去嘞！（華哥在港嗎？）喺香港呀！（兼做頒獎嘉賓？）無綫係有呢個安排，但華哥當時都未落實去唔去！」

監製唐基明昨也不吐不快：「人哋都玩晒啦，淨係定十一月廿八日截止投票已經唔公平，《刑警》係十二月十日先播結局，演員都係等嗰日畀觀眾睇佢哋嘅發揮、表現，亦係拉票嘅機會，依家咁早截票，我覺得唔公平，只係陪太子讀書。我都知有人受委屈，亦戥胡定欣不值，佢做得好好。」不過，胡定欣昨在微博澄清她指不公平是私事，與獎項無關。

衞世輝：佢哋心態係點

老友三哥為撐華哥，亦作出無聲抗議，他稱無綫雖有邀請，但他要開無綫劇外景，對出席與否仍有保留。

而身在外地工作的宣萱昨日說：「無綫係有邀請我出席，不過因為我有嘢做，唔喺香港所以出唔到。（件事愈搞愈大？）唔怕，佢哋一定有佢哋嘅原因，咁要問番佢哋。」

當日華哥怒轟無綫冷待《刑警》，加上當時台慶監製衞世輝「火上加油」，指演員有問題可直接致電給他，埋下今次「杯葛行動」的伏線，衞世輝昨說：「今次頒獎禮由另外一組去做，我唔可以為頒獎禮方面講嘢。（三哥、華哥唔出席頒獎禮係台慶件事引發？）最好問清楚佢哋心態係點，有乜唔開心可以同藝員科、經理人、監製講，據知有請佢哋做頒獎禮嘉賓。」而頒獎禮監製凌雪娥昨就此事說：「藝員部未交落實演員出席名單畀我。（華哥做頒獎嘉賓？）仲傾緊，都未定邊個嘉賓頒邊個獎嘅。」

文：影視組