中環耳目：李三元最愛唐閣海虎翅
2010-11-23 15:00
上一則新聞: 中環出更：黃德斌冰室撐枱腳
嚟「唐閣」，李主席熟晒地頭，皆因地點鄰近佢喺尖沙咀嘅公司，好就腳，每次請客或同家人聚餐，都係首選。「唐閣」係米芝蓮二星級食府，芸芸廣東名菜中，李主席至愛「清湯海虎翅」，理由係「整翅工夫多，自己好難整得好味。」佢又係注重健康嘅人，清湯翅，啖啖精華。
原汁原味唔「呷醋」
海虎翅屬翅中嘅一級極品，翅身較粗，「唐閣」師傅將魚翅加入老雞、瘦肉、金華火腿燉十小時，再以特別方法隔走肥油，剩下香濃嘅海虎翅，每碗上枱足有三両翅，每位盛惠六百八十元。唔少人食翅愛加醋，李主席就唔多「呷醋」，怕掩蓋咗真正翅香。呢味翅，佢同兩名兒子Jason同Jaime都愛不釋手，父子同心。
卸任東華主席大半年嘅李三元，月前重返校園，修讀歷史系碩士課程。何解突然愛上歷史？一切緣於擔任東華副主席期間，聽到唔少學者細訴東華及香港歷史，覺得津津有味。佢想了想，家族經營嘅皮革生意已交由大仔Jason，一於重拾讀書樂，從浩瀚歷史世界中，追尋人生意義。
討論:
| 分享: | |
|
|
|