中環出更：洪丕正請客有Dress Code

2010-06-01 15:00

跟蹤提及過的人和物:

上一則新聞: 中環出更：田二少睇靚錶嫌貴扁嘴

 

企業要成功，品牌顏色要貫徹如一，形象至深入民心。渣打銀行周日喺跑馬地馬場舉行盃賽，講明有dresscode（衣着規定），叫嘉賓着上象徵渣打嘅藍綠色。財經事務及庫務局常秘區璟智最聽話，揀嚟一條淺綠色裙，佢嘅銀行家老公冼銳民就着淺藍色Polo恤，行政會議成員梁智鴻（金刀梁）最大頭蝦，忘記了dresscode，佢笑言自己係「男」士，符合大會「藍」色要求喎，取其諧音。

金刀梁晒「男」綠色



渣打請客，渣打香港行政總裁洪丕正執到正招呼賓客，佢喺西裝外掛上渣打logo心口針，貼晒大會主題。唔少團體搞盃賽都會有dresscode，估唔到渣打提出嘅條件幾考人，區璟智笑言衣櫃冇藍綠色衫，左摷右摷先搵到一條淺綠色連身裙。商務及經濟發展局常秘蔡瑩璧（Yvonne）最醒目，披上一條七彩絲巾，上面有齊藍、紅、橙同綠色，百搭到極嘞。

金刀梁啱啱喺成都搭機趕返嚟撐場，嚟唔切換衫，戴咗條紅色呔。卓妮笑佢衣着唔合格，金刀梁指指手上由大會發畀佢嘅淺綠色馬牌反駁話：「個牌係綠色，我係男士，咁咪有晒藍綠色囉。」兜得咁叻，真係要寫個「服」字！

卓妮
討論:
分享: