2010-03-16 15:00

 

人大、政協「兩會」落下帷幕，政壇開始聚焦番香港政改之戰，主戰場係公民黨同社民連自導自演嘅「五區公投」，另一條戰線係港府能否為政改方案冧掂民主黨九票。據悉，港府游說白鴿黨，手上只得一張牌，就係政改方案中六個區議會功能組別議席嘅互選機制，極大可能採用畀泛民分得一杯羹嘅比例代表制，仲打定算盤計定數，二○一二年立法會選舉建制派攞四席，泛民瓜分餘下兩席，即係煲呔曾想用呢兩粒糖利誘白鴿黨。至於白鴿黨會唔會落疊，就要睇過至知。

拉散票容易擊破

港府經歷○五年政改方案被泛民綑綁式拉倒嘅慘痛教訓，認定逐個向獨立泛民議員游說嘅「拉散票」方式，費力又容易被擊破，當年一個譚香文反臉，就拉散其他本來到手嘅五票。今次港府改變玩法，集中火力攻取白鴿黨，意圖一口氣拿下九票，咁就定過抬油，但到目前一刻，港府同白鴿黨嘅關係相當曖昧，處於「雙方有誠意，結婚無銀紙」嘅尷尬局面。

世界好現實，講心亦講金，港府同白鴿黨即使喺政改上郎情妾意，但港府如果無豐厚「禮金」，白鴿黨唔白眼你至奇。消息稱，港府畀到白鴿黨嘅實質誘因只得一個，就係建議以比例代表制互選六個區會代表議席。

消息指，以建制派嘅地區實力，二○一一年區會選舉應可保持當前議席數目，如果六個區會代表行全票制，確實可攞晒六席，但俗語有話：「風水輪流轉。」建制派經歷○三年區會大敗教訓，猶有餘悸，亦唔敢玩咁大，傾向採用比例代表制，佢哋仲做沙盤推演，如果二○一二年政改方案獲通過，六個區會代表議席建制派同泛民將係四二比。即係話，泛民中地區樁腳最強嘅白鴿黨，至少分到一個議席，甚至兩個。○五年政改方案被否決拉倒，白鴿黨第二梯隊埋怨上位路斷，港府評估，比例代表制對白鴿黨有一定吸引力。

不過有白鴿黨人謂，煲呔曾呢兩粒糖其實好睇唔好食，日後互選六個區會代表時，建制派鐵票大派用場，而泛民一盤散沙，一旦協調唔成，有六、七人參選攤薄票源，泛民隨時見糖化水，一席都無。

協調難隨時輸凸

煲呔曾餵開錦鯉，利誘白鴿的確唔在行。白鴿黨背後操盤嘅「終極普選聯盟」提出，要二○一七年特首候選人提名門檻唔可以高過依家，二○二○年取消功能組別，港府消息話，訴求超越人大常委會「決定」同《基本法》，難以開綠燈，所以白鴿黨最終肯唔肯落疊支持政改方案，真係唔樂觀。